بقلم الشاعر سعيدسعيدامام
مش كل عشرة تتسمى عشرة
ولا كل قريب يبقى من الغاليين
في ناس تضحكلك في وشك
ومن وراك يبقوا اول الشامتنين
وانا كنت بفتح لهم قلبي
وفاكرهم من الناس الصافيين
اديهم من عمري ومن وقتي
واحسبهم وقت اللزوم سندين
لقيت اللي كنت شايله فوق راسي
باعني عشان كام قرشين
واللي كنت اقول عليه اخويا
طلع من اصله مش امين
يا خسارة قلبي في طيبته
ويا وجع سنين راحت هدر
كنت بقول العشرة غالية
طلع عند ناس العشرة سعر
ناس تاكل عيشك وملحك
وبعدها تنكر حتى الاثر
وناس لو وقعت في يوم
تسيبك وتقول مالناش خبر
اتعلمت ما ازعلش منهم
ولا اعاتب قلب حجر
اللي باعني بكامل ارادته
مش هشتريه ولو اعتذر
واللي خذلني وقت شدتي
مش هحتاجه وقت الانتصار
انا مش هغير طبع قلبي
بس هغير مين له اعتبار
هدي المحبة للي يستاهل
واللي يصون الود اختاره دار
واللي يبيع عشرة سنين
هسيبه لربنا والايام قرار
مش كل كلمة حلوة صدق
ولا كل حضن معناه امان
في ناس بتلبس وش الملاك
وجواها مليان حرمان
وفي ناس قليلة لو لقيتها
تسوى عندك عمر الزمان
تسندك وانت مكسور الخاطر
وتحفظ سرك في كل مكان
انا اتعلمت من اللي فات
ان الطيبة مش معناها هوان
وان السكوت مش دايما ضعف
وان البعد ساعات بيكون امان
مش هكره الدنيا عشانهم
ولا هقلب قلبي حجر صوان
هفضل انا زي ما انا
بس مش هدي ثقتي لكل انسان
اللي يحبني احطه في عيني
واللي يصونني يبقى له مكان
واللي يبيعني عشان مصلحة
يبقى خسرني وخسر انسان
ومن بكره هعيش مرتاح
ولا اشيل جوايا احزان
هسامح كل اللي ظلمني
بس مش هرجع لنفس المكان
لان القلب لو سلم مرة
مش لازم يسلم مرتين كمان
واللي عرف قيمة طيبتي
ده اللي يستاهل مني الامان
اما اللي استرخص عشرتي
ربنا يعوضني عنه بخير انسان
بقلم الكاتب وشاعر البسطاء
سعيد سعيد امام