كتب /ياسر جابر
في حديث علي صفحة البطلة الأولمبية المصرية سمر حمزة صاحبة الميدالية الذهبية في أولمبياد تورنتو البحر المتوسط فتحدث عن موضوع هروب اللاعبين من البعثات الرياضية لازم نتعامل معاه بشكل أعمق من مجرد إننا نلوم اتحاد أو رئيس بعثة ونحملهم المسؤولية كاملة.
أكيد المسؤولية موجودة، وأكيد لازم يكون فيه إجراءات وضوابط ومتابعة، لكن في النهاية لازم نسأل السؤال الأهم: إيه السبب الحقيقي اللي بيخلي لاعب يفكر أصلًا إنه يهرب؟
لأن الحقيقة إن اللاعب اللي عنده نية للهروب، مهما اتعملت احتياطات، ممكن يلاقي طريقة ينفذ بيها قراره.
الموضوع مش مجرد باب اتقفل أو رقابة زادت أو مسؤول قصّر في إجراء معين… الموضوع أكبر من كده.
لازم نبحث في الأسباب:
هل اللاعب شايف إن مستقبله في بلده مش مضمون؟
هل شايف إن الفرص أو التقدير أو الدعم مش كفاية؟
هل عنده مشاكل مادية أو نفسية؟
هل فيه وعود برا بيشوف إنها هتغير حياته؟
وهل إحنا أصلًا بنسمع للاعبين ونعرف هم بيفكروا في إيه قبل ما نوصل لمرحلة الهروب؟
مواجهة الظاهرة مش هتكون فقط بتشديد الإجراءات، لكن بفهم الدافع الحقيقي وراء القرار ومحاولة علاجه.
وفي نفس الوقت، لازم كل مسؤول يتحمل مسؤوليته، لكن من غير ما نحول كل حالة إلى شماعة نعلق عليها المشكلة ونقفل الملف.
لو عايزين نمنع تكرار الظاهرة، لازم نعالج السبب مش النتيجة.
الرياضة مش بس بطولات وميداليات… الرياضة كمان منظومة، واللاعب جزء أساسي منها، ولازم نسمعه ونفهمه ونحافظ عليه .
حفظ الله مصر وشعبها من كل سوء.