بقلم الشاعر سعيدسعيدامام
يا أبو الرجولة هدي
وخليك حنين معايا
أنا اللي شايلة بيتك
وبداري عليك حكايا
أنا اللي لما بتتعب
بسبق دواك وخطوتك
ولما الدنيا تعاند
تلاقيني جنب قوتك
أنا اللي من يوم ما جيتك
وانا حاطة قلبي في بيتك
لا يوم شكيت في عشرة
ولا يوم قللت من قيمتك
وبتزين كل ليلة
وأقول يمكن تفرح بيا
وألبسلك أحلى هدومي
وأرش ريحة حواليا
وأقول يا واد يا راجل
شوف الست اللي اختارتك
دي لو لفت الدنيا كلها
مش هتلاقي زي ستك
أنا مش ناقصة جمال
ولا ناقصة دلال وحسن
ده أنا لو مشيت في الشارع
تبص ليّا الناس بالحسن
بس أنا عايزة جوزي
يشوفني بعين الغلا
مش عايزة كلمة من بره
تسرق من بيتنا الهنا
يا أبو الرجولة مالك
ساكت ووشك متغير
من ساعة ما دخلت البيت
وانت عني بقيت بتدور
بره تضحك للخلق
وتحكي وتقول نكتة
وجوه لما أشوفك
تلاقيني واخدة منك سكتة
أقولك تعالى نقعد
تقوللي يومي كان طويل
أقولك طب كلمة حلوة
تقوللي بعدين يا جميل
وتقعد قدام الشاشة
وتنسى إن أنا حواليك
وأنا أقعد أعد الساعات
وأقول إمتى أضحك معاك
أنا مش عايزة أعاتب
ولا أحب أكتر كلام
أنا نفسي أحس بس
إن ليا عندك مقام
ده أنا أم عيالك كلهم
وشايلة همهم معاك
ولو يوم مال بيك الزمان
هتلاقيني واقفة وراك
أنا مش عايزة غير نظرة
تقول إنك لسه شايفني
ولا كلمة من قلبك
تخليني أقول كفاية فيني
يا أبو الرجولة افهم
الست لما تقول عايزاك
مش معناها إنها بتطلب
دي معناها إنها لسه هواك
خلي بيتك أولى بيك
وخلي عيالك يفتخروا
إن أبوهم لما يحب
يعرف يصون اللي اختاروا
ولو أنا يوم زعلت منك
صالحني بكلمتين
ده أنا لو قلبي صفا لك
أديك العمر مرتين
يا أبو الرجولة قرب
وخلي المسافة تنتهي
أنا مش عايزة منك غير
قلبك لما البيت ينادي
يا أبو الرجولة هدي
وبلاش تسيبني لوحدي
أنا اللي شلت معاك العمر
ومن غيرك مين يسندني
أنا مراتك وأم عيالك
وحبيبتك من سنين
لو تحفظ قلبي يا راجل
أعيش معاك العمر راضيين
بقلم الكاتب وشاعر البسطاء
سعيد سعيد إمام