بقلم / سعيدسعيدامام
مين قال ان السكوت حكمة وكل ساكت جبان
ومين قال ان الكلام بطولة وكل صوته امان
انا شفت ناس ساكتة وجواها ضمير صيان
وشفت ناس صوتها عالي وجواها خوف وحرمان
قالوا اسكت وخلي المركب تعدي وسط الامان
قلت لهم لو فيها خرم السكوت مش هينجي غرقان
قالوا الزمن كفيل وكل واحد له زمان ومكان
قلت لهم والحق لو ضاع مين يرجعه للغلبان
شفت اللي يقول الحق طول ما الحق على هواه
واول ما المصلحة تعارضه يبدل كلامه في ثوان
وشفت واحد ثابت على كلمته مهما الدنيا قست معاه
يخسر الف صاحب ولا يخسر ضميره في الزمان
شفت واحد بيتكلم عن الدين وعن ستر الانسان
واول ما المصلحة تنادي ينسى كلام الرحمن
وشفت فقير ما معاهوش غير لقمة وقلبه مليان حنان
يقسم لقمته مع غيره ويقول الحمد لله كمان
يا ناس مش كل ساكت يبقى خايف او مهان
فيه سكوت بيبقى حكمة وفيه سكوت بيبقى هوان
وفيه كلمة حق ترفع راس صاحبها وسط المكان
وفيه كلمة خوف تخلي صاحبها طول عمره ندمان
الكلمة مش لعبة ولا هي مجرد كلام
دي ممكن تفرح قلب وممكن تفتح احزان
ممكن تلم شمل ناس بعد خصام وهجران
وممكن كلمة طايشة تولع بين الخلان نيران
عشان كده قبل ما تتكلم خلي عقلك هو الميزان
وقبل ما تسكت اسأل نفسك سكوتي ده حق ولا هوان
لو كلمة منك تجبر خاطر قولها من غير خوف كمان
ولو كلامك هيكسر خاطر اسكت وخلي السكوت احسان
مش لازم تدخل كل معركة عشان تثبت انك شجاع
ولا لازم تعلي صوتك عشان الناس تقول لك بطل زمان
خليك فاهم ان الرجولة مش بالصوت ولا بالعدوان
الرجولة كلمة حق تتقال باحترام من غير ما تظلم انسان
فيه واحد يشوف المظلوم ويقول ماليش مكان
وفيه واحد يشوف الظلم ويقف ويقول ده بهتان
وفيه واحد يخاف من خلق الله ويبيع الحق عشان الامان
وفيه واحد يخاف من رب الناس ويقول الحق لو خسر كل مكان
قابلت شيخ كبير قاعد على باب دكان
قلت له يا حاج قولي الحق فين وسط الزحام
ضحك وقال يا ابني الحق مش محتاج كتر اعوان
الحق كلمة من قلب صادق ولو صاحبها غلبان
قال لي اوعى تفتكر ان السكوت دايما امان
ممكن سكوتك النهارده يوجع قلب انسان
وممكن كلمة منك في وقتها تغير عمر انسان
وتفضل سيرتك بعد الرحيل في قلوب الناس عنوان
قلت له طب واللي بيخاف من كلام الناس والحرمان
قال لي اللي يخاف من الناس عمره ما يعيش انسان
رضا الناس بحر كبير ملوش شط ولا مكان
لكن رضا الضمير يكفيك لو نامت عيون الزمان
قال لي خليك صاحب مبدأ مهما اتغير المكان
لو الناس باعت خليك وفي ولو خانوا خليك امان
لو الناس قست خليك رحيم ولو ظلموا خليك ميزان
لان اللي يبيع ضميره عشان الناس يخسر نفسه كمان
رجعت بيتي وكلام الشيخ فضل جوايا طول الزمان
وقعدت احاسب نفسي وافتكر كل موقف كان
كام مرة شفت الحق وسكت عشان اعيش في امان
وكام مرة قلت كلمة وكان المفروض اسيبها للنسيان
قلت يا قلبي من النهارده خليك دايما انسان
ما تبيعش حقك وما تظلمش حد عشان مكان
لو قدرت تصلح بين اتنين افتح بينهم باب امان
ولو شفت قلب مكسور طبطب عليه ولو بكلمة حنان
ولو شفت صاحبك محتاجك ما تقولش ماليش مكان
ولو شفت جار تعبان اسأل عليه ولو حتى سلام
ولو شفت حد بيغلط انصحه من غير كبر وهوان
يمكن كلمة منك ترجعه لطريق الخير والايمان
اصل الدنيا مش دايمة ولا العمر ليه ضمان
واللي فاكر نفسه باقي بكرة ينساه الزمان
المال بيروح والجاه يزول والكرسي مهما طال له اوان
واللي هيفضل منك في الدنيا سيرة طيبة وقلب انسان
وفي اخر الطريق لما يسكت صوت الزمان
وتقفل ابواب الدنيا وتختفي كل الالوان
مش هينفعك صوت عالي ولا منصب ولا سلطان
هينفعك قلب ما ظلمش وضمير عايش في امان
هتسأل نفسك ساعتها كنت مين بين البشر
كنت بتجبر الخاطر ولا كنت سبب في كسر انسان
كنت بتقول الحق لما الحق كان محتاج لسان
ولا كنت بتسكت خوف من الناس وتقول اصل السكوت امان
ساعتها هتعرف ان السكوت مش دايما حكمة
وان الكلام مش دايما شجاعة او برهان
الحكمة انك تعرف امتى تقول الحق باحترام
وامتى تسكت لو كلامك هيكسر قلب انسان
فاسكت لما سكوتك يبقى ستر وامان
واتكلم لما سكوتك يضيع حق انسان
وخلي ضميرك صاحبك وخليه دايما هو الميزان
لان اللي يعيش بضمير صاحي يفضل عزيز مهما دار الزمان
وخلي لسانك للخير لو الدنيا كلها دخان
وخلي ايدك للخير لو الخير قليل في المكان
وخلي قلبك رحيم حتى لو قابلت قلب قاسي وغلان
لان الخير مش بيضيع ورب الخير حافظه للانسان
ومتبعش كلمة حق عشان تصفيق او مكسب او مكان
ومتخليش خوفك من خلق الله يخليك طول عمرك ندمان
اللي يرضي رب الناس عمره ما يخسر في الميزان
واللي يصون ضميره ينام اخر الليل مرتاح وامان
وفي النهاية لما يسكت كل صوت وكل لسان
هيبقى السؤال البسيط اللي ملوش غير جواب واحد كمان
كنت سبب فرحة ولا كنت سبب وجع واحزان
كنت انسان بجد ولا مجرد عابر في حياة انسان
مين قال ان السكوت حكمة وكل ساكت جبان
ومين قال ان الكلام بطولة وكل متكلم شجاع
الحكمة انك تعرف امتى تسكت وانت انسان
والشجاعة انك تقول الحق من غير ما تظلم انسان
لان الكلام لو من ضمير يبقى نور وامان
والسكوت لو وقت الحق يبقى وجع وهوان
وفي الدنيا دي كلها مفيش اغلى من ضمير انسان
يعيش ويموت وهو عارف انه ما باعش الحق عشان انسان