بقلم الكاتب الشاعر سعيدسعيدامام
قابلت ضلي ماشي قدامي بخطوتين
ناديت عليه مردش
كأنه زعلان بقاله سنين
جريت وراه وقولت استنى
قاللي استنى ليه ولمين
من يوم ما بعت فرحتك
وأنا سيبتك من ساعتها سنين
قولتله أنا كنت بحارب
قاللي حاربت لمين
حاربت عشان ترضي ناس
ولا مرة رضيو يومين
قولتله كنت فاكر
الجدعنة ليها تمن
ضحك وقاللي يا صاحبي
إنت لسه ما عرفت الزمن
كل ما تفتح باب
هتلاقي بابين مقفولين
وكل ما تزرع وردة
هيطلع حواليها شوكتين
قولتله طب أعمل إيه
قاللي خليك زي ما إنت
لا تغير لون قلبك
ولا تلبس وش غيرك إنت
سيب اللي باع يبيع
وسيب اللي خان يخون
اللي يشرب من بحر الغدر
يعطش مهما يكون
ما تحسبش عمرك
بعدد اللي حواليك
احسبه بعدد القلوب
اللي دعتلك من غير ما تدري بيك
قولتله طب والوجع
قاللي ده ضيف ويمشي
إنما اللي يبيع نفسه
عمره ما يعرف يمشي
بصيت لقيته بيبعد
وسط الزحمة والدخان
جريت أنادي باسمه
رد عليا في ثوان
لو يوم لقيتني غبت
يبقى إنت اللي ضيعتني
ولو لقيتني جنبك
يبقى الدنيا لسه بتعلمني
اختفى وسابني واقف
براجع كل السنين
لقيت أكبر عدو للواحد
مش الناس
لما يضيع من قلبه اليقين
ومن يومها كل ما أبص
في مراية البيت في كل حين
أسأل ضلي قبل ما أخرج
إنت راضي عني
ولا لسه زعلان بقالك سنين
