كتبت: د. امنيـه ماهـر
فيه ناس كتير مش عايشة حياتها هي بس بتفكر فيها
إنتي قاعدة مع أولادك بس دماغك في بكرة
بتضحكي في لحظة حلوة بس جواكي صوت بيقول طب وبعدها
بتنجزي حاجة كويسة بس أول ما تخلصي ييجي قلق جديد مكانه
وكأن عقلك مش عايز يسيبك تهدي حتى دقيقة
القلق مش دايما بييجي في شكل خوف واضح
أحيانا بييجي في شكل تفكير زيادة وتحليل لكل حاجة ومحاولة مستمرة إنك تأمني نفسك ضد أي وجع ممكن يحصل
فتلاقي نفسك طول الوقت بتحضري للأسوأ
وبتفكري في كل الاحتمالات وبتراجعي كل كلمة
وبتعيدي كل موقف ألف مرة في دماغك
وفي النص ده كله الحياة بتعدي
أخطر حاجة في القلق إنه بيقنعك إنك كده بتتصرفي صح وإن التفكير الزايد ده حماية
بس مش كل تفكير حماية في تفكير بيبقى سجن ناعم بيخطف منك اللحظة وإنتي مش واخدة بالك
لأن اللحظة الوحيدة اللي تقدري تعيشيها فعلا هي اللي إنتي فيها دلوقتي
مش بكرة ولا السيناريوهات اللي في دماغك
ولا الاحتمالات اللي ممكن عمرها ما تحصل
إنتي مش محتاجة توقفي تفكيرك تماما
بس محتاجة ترجعي نفسك كل شوية للحقيقة البسيطة دي
أنا دلوقتي في أمان كفاية إني أعيش اللحظة دي
لما تهدي شوية هتكتشفي إن فيه لحظات حلوة كانت بتعدي جنبك وإنتي مش شايفاها
ضحكة ابنك هدوء لحظة نفسك وإنتي قاعدة من غير ضغط
الحياة مش محتاجة تتفهم كلها عشان تتعاش
هي محتاجة تتعاش بس
مش لازم تكوني جاهزة لكل حاجة عشان تحسي بالراحة
ومش لازم تعرفي كل الإجابات عشان تعيشي اللحظة
أحيانا بنكون محتاجين نتعلم ازاى نتقبل وجود الافكار شوية وبس مش نحاربها ونهاجمها لانها هتزيد وتتعبنا اكتر
واخيرا
ارفقي بنفسك لانها تستحق♡
د. امنيـه ماهـر
اخصائية الدعم النفسي وتمكين المرأة