بقلم : د. إبراهيم خليل إبراهيم
روى كريم باشا الصديق المقرب من البطل أحمد المنسي عن الصقر صديق البطل أحمد المنسي حيث قال : كان في يوم طالعين مداهمة بالنهار وكان أحمد المنسي قائد المأمورية ومعانا العساكر والناس وكنا في مكان صحراء في العريش وإحنا ماشيين على رجلينا لقينا صقرين تحت صخرة كبيرة شكلهم طبعا صغيرين لسه مبيطيروش فلقيت الشهيد المنسي بيقولي : تعالى نجبهم معانا الكتيبة .. شوفلي حبل مع العساكر أو السواقين .. قولتله : هنعمل إيه بيهم .. ملهمش لازمة ؟ قال لي : إسمع الكلام .. وفعلا جبنا حبل وربط كل واحد في عربية وإحنا ماشيين بقوله : هتعمل بيهم إيه ؟ رد عليا رد مستوعبتوش سعتها .. قال لي : أولا هيموتوا هنا في الحر .. شكلهم واقعين من عش أو من الصقور الكبيرة .. ناخدهم معانا الكتيبة نشربهم ونأكلهم أي حاجة وبعدين يا كريم دول هيحكوا إحنا عملنا إيه معاهم وبنعمل إيه في أرضهم زي ما الزرع اللي على الأرض ده هيحكي كل حاجة عنا دول الاتنين مش هيكدبوا أبدا
أضاف كريم : إستغربت جدا وأنا في سري بقول إحنا في إيه ولا في إيه عايزين نخلص ونرجع على خير .. صقر إيه دلوقتي وهيحكي إيه يا منسي ؟ المهم رجعنا فعلا على الكتيبة وفعلا العساكر خدت صقر وقال لهم أحمد منسي : أوعوا يموت وهو فضل محتفظ بواحد وبقى زي صاحبه كانت كيميا بينهم غريبة بقيت كل ما أشوفه أقوله أخبار إبنك إيه ؟ يفضل يضحك يقولي : كويس ... ومشيت من الكتيبة ومعرفش إيه اللي حصل للصقر من بعده
