وجع العقول
تعبت أشوف العقل عايش جوه قضبان
والفكر مربوط بخوف وتوهان
وكل واحد حافظ دور القطيع بإتقان
ولو سأل سؤال قالوا عليه غلطان
صرنا نحب الصوت العالي والهتاف
ونخاف من كلمة تفتح ألف ملف وخلاف
مع إن السؤال عمره ما كان خوف وضعاف
ده السؤال أول طريق للنور والانكشاف
فين العقول اللي كانت تخلق حضارة
فين الحروف اللي كانت تهد الحجارة
بقينا نعيش عمرنا جوه دوارة
نستهلك كلام ونموت في نفس العبارة
الجهل مش إنك ما تعرفش كتاب
الجهل إنك تقفل عقلك بالأبواب
وترفض تسمع رأي أو تشوف الأسباب
وتعيش أسير وهم حافظه بالغياب
قالوا اسكت بلاش تفكير كتير
أصل التفكير يوجع ويكشف المستور الخطير
قولتلهم العقل اللي ما يحلمش يصير
جسد ماشي لكنه من جوه أسير
الأمم ما قامتش بكتر الكلام
ولا بالتصفيق ولا طول الخصام
الأمم قامت بعقل يعرف النظام
ويحول الفكرة لإنجاز قدام
إزرعوا في الطفل حلم الاختراع
علموه إن النجاح مش بس اتباع
وإن الطريق الصعب آخره إبداع
وإن العقل الحر عمره ما ينباع
يا وجع أمة خايفة من السؤال
ومن كل صوت بيحاول يغير الحال
تحارب المبدع وتكافئ الجهال
وبعدين تسأل ليه الحلم مال
افتحوا الشبابيك يدخل الهوا
خلو العقول تفكر مرة من جوا
يمكن فكرة صغيرة في يوم تداوا
أمة كاملة كانت تايهة في نواها
يا رب ابعت نور يصحي العقول
ويكسر قيود الخوف والخمول
ونعيش بعلم وفكر وحلول
مش بعصبية وكلام منقول
كلمات وتأليف شاعرالبسطاء سعيدسعيدامام