فراغ ممتلئ

 

بقلم/نشأت البسيوني

في لحظات معينة تحس ان في فراغ جواك لكن الغريب انه مش فاضي فعلا ده فراغ مليان افكار ومشاعر واسئلة من غير اجابات مليان كلام ما اتقالش ومواقف ما اتقفلتش وذكريات بترجع في وقتها وبدون وقتها وكأن جواك عالم كامل ساكت بس صوته عالي

وتبدأ تحس انك مش عارف تهرب من الفراغ ده ولا قادر تملأه بأي حاجة لان اي محاولة بتكون مؤقتة واي انشغال بيعدي ويرجعك

لنفس النقطة ويمكن ده لان الفراغ الحقيقي مش نقص في الحياة لكنه زيادة في اللي جواك وتسأل نفسك ليه الفراغ ده بييجي فجأة ليه بيختار لحظات هادية يظهر فيها وليه رغم انه مريح احيانا لكنه تقيل احيانا تانية يمكن لانك بتكون اقرب لنفسك في اللحظات دي واقرب لكل حاجة حاولت تبعد عنها ومع الوقت تفهم ان الفراغ ده مش عدو لكنه مساحة مساحة بتديك فرصة تشوف نفسك بوضوح

تفهم اللي محتاجه واللي مش محتاجه تراجع علاقاتك وقراراتك وتسمع صوتك الحقيقي بعيد عن اي تأثير خارجي وتلاقي نفسك بتتقبل الحالة دي بدل ما تقاومها وتبدأ تستخدمها انك ترتب اللي جواك تهدي افكارك وتسمح لمشاعرك تطلع من غير ما تحكم عليها وتفهم انك مش لازم تكون مشغول طول الوقت علشان تكون كويس تدرك ان الفراغ اللي كنت خايف منه هو في الحقيقة بداية

امتلاء مختلف امتلاء بالوعي والهدوء والفهم وان الانسان لما يواجه نفسه بصدق يقدر يبني حياة اقرب ليه واوضح من اي وقت فات