كتب تامر ياسين
التوكتوك في عين شمس.. وسؤال بدون إجابة: فين التسعيرة؟!
في الوقت اللي بقى فيه التوكتوك وسيلة أساسية للمواصلات داخل المناطق الشعبية، خاصة في حي عين شمس، بقى فيه أزمة حقيقية بتواجه المواطنين يوميًا، وهي الأسعار المبالغ فيها بشكل غير منطقي، وغياب تسعيرة واضحة تحمي الراكب من الاستغلال.
مش معقول إن مشوار بسيط جدًا، ممكن ما يكملش 5 دقايق، يوصل سعره لأرقام مبالغ فيها، وكل سواق يحدد السعر "على مزاجه"، بدون أي رقابة أو التزام بقانون. وده بيحط المواطن في موقف صعب، يا إما يدفع وهو ساكت، يا إما يدخل في جدال يومي مالوش لازمة.
ورغم إن في جهود واضحة من حي عين شمس، وعلى رأسهم المهندسة
أمل فوزي
في محاولة تقنين أوضاع التكاتك وتنظيمها، إلا إن المشكلة الأكبر لسه قائمة، وهي عدم وجود تسعيرة رسمية مُلزمة للجميع.
السؤال هنا:
لو الدولة قدرت تنظم أسعار الميكروباص والتاكسي، ليه التوكتوك لسه خارج المنظومة؟
وليه المواطن هو اللي يتحمل النتيجة؟
الحقيقة إن تحديد تسعيرة واضحة للتوكتوك مش رفاهية، ده ضرورة لحماية الناس، خصوصًا في ظل الظروف الاقتصادية الحالية. التسعيرة لازم تكون عادلة، تراعي السواق وفي نفس الوقت ما تظلمش المواطن.
الحلول موجودة وبسيطة:
وضع تسعيرة محددة حسب المسافة داخل الحي
إلزام كل توكتوك بملصق واضح بالتعريفة
تكثيف الرقابة والمتابعة على المخالفين
تخصيص أرقام شكاوى سريعة للمواطنين
في النهاية، التوكتوك مش عدو، بالعكس هو وسيلة مهمة جدًا، لكن لازم يكون في نظام يحكمه وعدالة تحكم أسعاره.
عين شمس تستحق خدمة محترمة.. وسعر عادل.