كتب ايهاب ثروت
يجب ان نعلم جميعا ان الرياضة لا تعلم التحكم في الانفعال إلا اذا علمنا الطفل كيف يتحكم قبل التحرك فكل طفل يستخدم يده ليس قليل التربية فهو فقط لم يتعلم التحكم
منذ عدة ايام قرأت مقال عن طفلة
إيديها سابقة تفكيرها
وضربت أصحابها و تم طردها من التمرين.
ووجدت تعليقات على نفس المقال
لحالات قريبة جدآ و متكررة
و لكن ماذا نفعل فى هذه الحالة ؟
يجب ان نفهم اولا ان الموضوع ده مرهق للأم من حيث
إحراج قدام المدربين وخوف على الابنة من عقاب المدربين والمدرسين وإحساس إن كل ما تعمليه دون نتيجة .
لكن يجب ان تعلمى ان هذه الحالة
ليست سوء تربية أو قلة أدب و لكن مهارة اسمها: (تأخير الاستجابة) لم يتم تعليمها للبنت
و الرياضة وحدها ليست كافية
فالرياضة بتبني جسم ومهارة حركية لكن التحكم في الانفعال مهارة عصبية وسلوكية.
المدرب يمكنه ان يساعد اذا كان لديه خبرة في النوع ده من التدريب ولكن أغلب المدربين مسؤلين عن تخصصهم فقط
فالأصل إن التدريب بيبدأ في البيت بشكل مقصود ومتكرر.
والعقاب الكتير ليس حل لأنه يعالج السلوك بعد حدوثه
لكن هدفنا إن السلوك لا من الأساس فالأبناء يحتاجون تعلم
تتوقف – تفكر – تتصرف
و اليكم بعض الاقتراحات لحل هذه المشكلة
_ في البيت
١. تدريبات على أوامر تأخير الاستجابة
٢. ألعاب تعتمد على الانتظار للإشارة
٣. مكافأة واضحة لما تلتزم بالانتظار
_ في التمرين
١. الاتفاق مع المدرب على تعزيز السلوك الصح و ليس عقاب الخطأ
و اليكم بعض نماذج للتدريب فى المنزل
1️⃣ تدريب (وقف - فكر - اتحرك)
_ اتفقوا على كلمة سر في البيت:
"استني"
التمرين:
١ - اطلبي منها تعمل حاجة
٢ - فجأة قولي “استني”
٣ - المفروض تثبت مكانها
٤ - بعدها تكمل لما تقول “كملي”
ابدئي بـ ٣ ثواني انتظار
وزودي تدريجيا
الهدف: المخ يتعود إن فيه مسافة بين الأمر والتنفيذ
ألعاب تأخير الاستجابة مثل
١ - لعبة الإشارة:
متتحركيش غير لما أقول كلمة معينة
٢ - لعبة التمثيل:
أعمل حركة تقلديني بس لما أقول “دلوقتي”
٣ - لعبة الكراسي
سباق وتوقف مفاجئ
فهذه الألعاب تحسن التحكم في الحركة.
يومين في الأسبوع كأنه تمرين
نظام النقاط والمفاجأت
لما تجمع ٥ نقاط تاخد مكافئة بسيطة
١ - لو استنيتي ٥ ثواني قبل ما تتحركي = نجمة
٢ - لو سبتي مكان لحد وممدتيش ايدك = نجمتين
٣ - لو اي موقف من اللي كانت بتمد اديها اتكرر تانى لكن هذه المرة لم تمد اديها = ٣ نجوم
و يجب ان نركز على اللحظات التى سيطرت فيها على نفسها
المخ بيتعلم بالتكرار والمكافئة اكتر من العقاب
تمرين المواقف قبل ما تحصل
جمعي كل المواقف اللي كانت بتمد فيها اديها
في ورقة وقبل كل تمرين نختار موقف منهم وتكلمها فيه
لو حد عمل كذا وكذا
خليها تقول الرد بصوت عالي:
"هستنى" "هقول للكابتن" "مش هستخدم إيدي"
تكرار الجملة بيبرمج الاستجابة
تدريب تتحكم في جسمها
لما تتضايق في البيت:
١ - خليها تشبك إيديها مع بعض
٢ - تضغطهم جامد ٥ ثواني
٣ - تاخد نفس عميق
اى نستبدل الضرب بحركة بديلة
اتفاق مع المدرب
الأول تعرفيه انك بالفعل شغال عليها في البيت وانك بتتابعي مع معد نفسي ومحتاجين منه دور واضح كمساعدة و انها لو التزمت بأمر الكابتن ومتحركتش قبل ما يخلص
يتم مدحها فورا
وعرفيه ان العقاب المتكرر لوحده مش بيبني مهارة
لازم يحصل تعزيز لما تنجح
ونصائح عامه بتكمل الخطة دي
الممنوع
١ - متوصفيهاش قدام الناس إنها مندفعه
٢ - متقارنيهاش بزميلاتها
٣ - متكسريش روحها بسبب تكرار الخطأ
المطلوب
١ - امدحي أي تحسن ولو بسيط
٢ - خلي لغة البيت هادية
٣ - افصلي بين السلوك وشخصيتها
لو طبقنا الخطوات دي لمدة ٣ شهور بدون تحسن واضح
هنا نحتاج تقييم متخصص لنتأكد إن مفيش صعوبة تنظيم انتباه محتاجة تدخل أعمق.
وده مش عيب…
ده وعي ومسؤولية.