بقلم/نشأت البسيوني
في لحظات معينة تلاقي نفسك ماعدتش فاهم انت رايح فين ولا جاي منين الأيام بقت شبه بعضها والوجوه بقت متكررة والضحكات اتعلمت تخدعك والحزن اتعلم يدخل من أضيق باب في روحك من غير ما تستأذن كأن الدنيا بتجرب فيك كل اختبار مرة واحدة وتنتظر تشوف هتصمد ولا هتنهار وتبدأ تلاحظ انك بقيت تمشي بعقلك مش بقلبك تتعامل بعادتك مش بإحساسك كأن جزء كبير
منك اتطفى وانت مش واخد بالك بقت مشاعرك مرهقة ودماغك مشحونة وقلبك مش لاقي مكان يرتاح فيه وسط كل الضوضاء اللي بتكبر حواليك يوم بعد يوم ومع كل ده يبدأ صوت داخلي خافت يحاول يرجعك لنفسك يقولك انك محتاج توقف لحظة توقف تهرب من كل حاجة تهرب من الكلام اللي مالوش معنى ومن العلاقات اللي بتستنزفك ومن الهموم اللي مش كلها بتخصك تهرب لنقطة واضحة
ترجع فيها تتعرف على ملامحك اللي ضاعت منك وانك مهما تبعترت تقدر تلم نفسك من جديد وتكتشف انك طول الوقت كنت بتحاول تبقى قوي بالطريقة اللي الناس عايزينها لكن قوتك الحقيقية مش هناك قوتك الحقيقية في انك تواجه نفسك بصدق في انك تعترف انك مش بخير في انك تتعامل مع قلبك كأنه صاحبك مش سجين في انك تسمح لنفسك تتعب وتغلط وتقع
وتقوم براحتك تدرك ان الحياة مش محتاجة منك تكون كامل محتاجة تكون صادق محتاجة تفهم إمتى تكمل وإمتى توقف ومحتاجة تحافظ على الجزء الصغير اللي جواك واللي لسه عايش رغم كل حاجة الجزء اللي بيقولك مهما الدنيا لخبطتك انت لسه قادر تتصلح ولسه قادر ترجع طريقك حتى لو تغير شكله