بقلم/نشأت البسيوني
في حياة كل انسان وقت غريب ما بيتحسبش وما يتقاسش وما يدخلش في عمر ولا يظهر في صورة ولا يتكتب في تاريخ وقت بيعدي من غير ما الساعة تحس بيه ومن غير ما الناس تشوفه وقت الانسان فيه مش واقف ولا ماشي هو بس موجود كده بين حالتين لا رايح ولا جاي الوقت ده بييجي لما تبطل تستعجل وتبطل تخاف وتبطل تحاول تسبق نفسك لما تهدأ من جوه حتى لو الدنيا حواليك
دوشة ولما تسكت الاسئلة اللي كانت بتجري ورا بعض في دماغك وتسيبها تهدأ زي ميه كانت مغلية وبردت فجأة وفي الوقت ده الانسان ما بيحسش بالانجاز ولا بالفشل ما بيحسش انه كسب ولا خسر هو بس حاسس انه خفيف كأن حمل كبير كان مربوط في روحه واتقص من غير ما ياخد باله ويبتدي يشوف الحاجات الصغيرة اللي ما كانش شايفها قبل كده نظرة بسيطة كلمة عدت من
غير ما تتسمع ضحكة جت في وقتها احساس انك مش مطالب تبرر وجودك لحد الوقت اللي ما تعترفش بيه الساعات هو اكتر وقت صادق في حياة الانسان لانه ما فيهوش ضغط ولا سباق ولا مقارنة فيه انت زي ما انت من غير ما تكون مشروع اصلاح ولا نسخة تحت التطوير ولا شخص محتاج يثبت انه احسن من امبارح
وفي الوقت ده تفهم انك كنت طول عمرك بتجري ورا صورة مش
صورتك ورا صوت مش صوتك ورا حلم اتزرع فيك من غير ما تسأل نفسك هو ده حلمي ولا حلم حد تاني وانت صدقته ومشيت وراه الوقت الغريب ده بيعلمك ان الهدوء مش ضعف وان البطء مش فشل وان التوقف احيانا اشجع قرار وان الانسان مش لازم يكون دايما في حالة انتاج عشان يكون ليه قيمة ومع مرور الوقت تكتشف انك اتغيرت من غير ما تعمل حاجة كبيرة ولا تاخد قرار
مصيري ولا تعلن بداية جديدة اتغيرت بس لانك سبت الوقت يعدي عليك من غير مقاومة ومن غير خوف ومن غير ما تحاول تمسكه بايدك وتخرج من الوقت اللي ما تعترفش بيه الساعات وانت فاهم ان الحياة مش كلها محطات واضحة ولا نهايات معلنة ولا بدايات مزينة الحياة فيها مساحات صامتة هي اللي بتصلح اللي اتكسر وتجمع اللي اتبعتر وتخليك ترجع انسان قبل ما ترجع اي حاجة
تانية وفي الاخر تعرف ان اجمل الاوقات في عمر الانسان هي الاوقات اللي ما حدش قدر يحسبها ولا يصورها ولا يشرحها لكنها سابت جواه اثر يخليه اكتر هدوء اكتر صدق اكتر قبول لنفسه وللدنيا زي ما هي