بقلم/نشأت البسيوني
في لحظة محدش يتوقعها تلاقي نفسك واقف على حافة الضوء لا انت جوه النور ولا انت غارق في العتمة انت بس في النص في المكان اللي يعلمك كل حاجة ويكشف لك كل حاجة ويعريك قدام نفسك قبل ما يعريك قدام الدنيا المكان اللي تعرف فيه مين اللي كان بيتمنى سقوطك ومين اللي كان بيدعي لك في السر ومين اللي كان بيمشي جنبك وهو أصلا مستني أول هزة عشان يسيبك
هناك على الحافة دي بتسمع دقات قلبك أوضح من أي صوت في الدنيا يمكن لأنها الدقات الوحيدة اللي ما كدبتش عليك ولا مرة كل الناس بتلبس وشوش وتغير كلام وتبعد وتسيب وتوجع إلا قلبك عمره ما خانك وعمره ما خبى عنك الحقيقة حتى لو كانت مؤلمة
الدنيا مش بتتغير يا محترم لكن اللي بيتغير نظرتك ليها لما تتصدم مرة واثنين وعشرة تبدأ تفهم ان اللي بتشوفه مش دايما حقيقي
وان الضحكة مش دايما رضا وان القرب مش دايما أمان وان الوعود مش دايما نوايا نقية وتبدأ تتعامل مع الحياة بعين تانية عين اتلسعت كتير لدرجة انها بقت تميز من أول نظرة مين جايلك بحب ومين جايلك بمصلحة ومين فاتح لك ايده وهو أصلا بيجهز السكينة لكن رغم كل ده ورغم كل الخيبات يفضل جواك حتة صغيرة ما بتموتش حتة عنيدة بتقومك بعد كل وقع بتشدك لقدام
بعد كل كسر بتقول لك ما تخافش بعد كل نهاية بتفتح لك باب بداية جديدة الحتة دي هي اللي بتمنعك تستسلم وبتخليك تكمل وبتخليك توقف على الحافة مش خايف من النور ولا مرعوب من الضلمة وتفتكر في اللحظة دي انك مش محتاج تصدق كل الناس ولا تحارب كل الناس ولا تثبت نفسك لكل الناس انت محتاج بس تثبت لنفسك انك أحسن من وجعك اقوى من تعبك أشرس من
الظروف اللي حاولت تكسر روحك وانك مهما اتحاربت وقعت انكسرت في الآخر هتقوم لأن اللي شاف العتمة وفضل واقف على الحافة هيدخل النور ثابت من غير خوف من غير تردد من غير تراجع المعركة الحقيقية مش مع الناس ولا مع الدنيا المعركة الحقيقية معك انت هل هتسمح للوجع يشكلك ولا هتسمح لقلبك يفضل حي هل هتسيب الظلمة تكسب ولا هتفتح باب النور برجلك
وتدخل ووشك مرفوع وعلى الحافة دي بس بتعرف حقيقتك وبتعرف قيمتك وبتعرف انك خلقت من نار ما بينطفيش نورها ولا بينكسر لهبها وانك مش مجرد شخص بيعدي في الدنيا انت قصة كاملة ولسه نهايتها ما اتكتبتش