بقلم/نشأت البسيوني
في لحظه معينه في حياة كل انسان الطريق بينطفئ الطريق اللي كنت فاكره دايم واللي كنت فاكره ثابت يبدأ يبهت قدامك زي مصباح بينخفض نوره تدريجيا لحد ما تبص قدامك وما تلاقيش غير مساحه فاضيه ما تعرفش تمشي فيها ولا تعرف ترجعلها خوف غريب يكمش صدرك مش خوف من الظلام لأ خوف من اللي جواك من اللي اتغير فيك من اللي مبقاش زي الاول ومن اللحظات اللي
اكتشفت فيها انك ما كنتش واقف على ارض صلبه زي ما كنت فاكر تبتدي تعرف ان الانسان مش بس بينطفئ من التعب الانسان بينطفئ لما يدي فوق طاقته ولما يتجاهل نفسه سنين ولما يحاول يكون سند فوق ما يتحمل علشان ناس ماوقفتش جنبه يوم ولما يفضل يحارب لوحده في معارك كانت اكبر منه ولما يخاف يزعل حد ويزعل نفسه وما يقولش ولما ينكسر جواه اكتر من مره
ويسكت وكأنه ماحصلش حاجه وساعات الانطفاء مش ضعف ولا هروب ساعات الانطفاء علامه ان روحك وصلت حدها علامه انك اتأذيت اكتر مما قدرت تتحمله وانك محتاج توقف محتاج تعيد بناء نفسك من اول وجديد محتاج قلبك يستريح ومحتاج تفهم انك مش مجبور تفضل قوي طول الوقت ولا مجبور تكون ثابت في كل المصايب ولا مجبور تشيل الدنيا فوق كتافك علشان ترضي حد
لأنك انت الاهم وانت اللي لو وقعت محدش هيكمل مكانك ولا حد هيحس حجم اللي جواك غيرك انت وفي وسط الانطفاء هتكتشف حاجه مهمه جدا انك طول عمرك كنت شايل ناس اكبر من حجمها وجواك اكبر من اللي استحقوه وانك كنت بتسامح كتير وتتنازل كتير وتبرر كتير لحد ما نسيت نفسك وانك كنت بتدي فرص لقلوب ماقدرتكش وكنت بتدور على وجودك في عيون ناس فقدت أصلا
معنى الوفا ومعنى الاحتواء وساعتها بس تفهم ان الانطفاء كان ضروري علشان ينظف طريقك من اللي مايلزمكش ويفتح لك باب لناس انضف ولحياه أهدى ولطريق أنقى وأنك لما تتظلم وتنكسر ما ديش نهايه ده بدايه روح بتتولد من جديد ومع الوقت هتعرف إن اللي راح ماكانش ليك وإن اللي اتغير ماكانش ثابت وإن اللي اتأخر ماكانش مناسب وإن ربنا كان بيحطك في اختبارات علشان يطلع
منك نسخه أصلب وأقوى وأنضج نسخه تعرف قيمتها وما تسمحش لحد يقلل منها نسخه تفهم إن الدنيا مش سباق وإنك مش مجبر تسرع ولا تهرب وإن البطء أحيانا ينقذك من أحزان كتير وإن التأني ساعات بيكشف لك وجوه أنت ما كنتش شايف حقيقتها ومع كل ده يفضل جواك أمل صغير حتى لو مطفي حتى لو ساكن حتى لو ماحدش شايفه لكنه موجود زي شراره صغيره مستنيه نفس جديد
علشان تولع من تاني وساعتها هتقوم تقوم من غير ما تحتاج حد يرفعك تقوم لأن بداخلك حاجه اتبنت حاجه اتعلمت حاجه اتصلبت حاجه فهمت الطريق ولما نورك يرجع يضوي هيفاجئك إنك بقيت أقوى من كل مره وقفت فيها وإنك ماكنتش منطفئ انت كنت بتتجهز لمرحلة تليق بيك