كتبت // نجلاء عبد الوهاب
تجار "الكيف" حفروا الخرسانة وعملوا دولاب للمخدرات.. "أغرب مخبأ" للصنف!
عمرك
تخيلت إن "شيطنة" تجار الصنف توصل بيهم لدرجة إنهم يحولوا كوبري خرسانة
لمخزن سري للسموم بتاعتهم؟ أه والله زي ما بقولك كده.. الموضوع مكنش مجرد
فكرة طقت في دماغهم، دي كانت خطة "جهنمية". استغلوا فتحة في سقف الكوبري
وعملوا لها باب بيقفل بإحكام، وكأنهم حولوا مرفق عام لـ "خزنة" أو دولاب
بيشيلوا فيه بضاعتهم!
التخفي في لبس عمال نظافة!
وعشان
يكملوا الفيلم الهندي ده ويبعدوا عن العين، قرروا يلبسوا لبس عمال نظافة
"زبالين". الخطة كانت ماشية على مبدأ "التخفي في الظاهر"؛ يعني لو شوفتهم
ماشيين جنب الفتحة دي بلبسهم المبهدل، هتقول "يا عيني ربنا يعينهم على
شقاهم"، وعمر ما هييجي في بالك لحظة إنهم بيخزنوا "شحنة سموم" في قلب
الكوبري!
خيط الجريمة: فيديو ومراقبة!
الموضوع
بدأ يتكشف قدام رجال المباحث في الجيزة، بعد ما وصلت ليهم معلومات إن فيه
ناس بزي عمال نظافة بيترددوا بشكل مريب تحت واحد من كباري الجيزة.
المعلومات دي ركبت مع "فيديو" كان منتشر على السوشيال ميديا، بيظهر فيه
اتنين حركاتهم غريبة وهما بيتعاملوا مع "فتحة سرية" في جسم الكوبري.
اللقطات كانت واضحة: لفة بتترمي لجوه، والتأكيد إن اللي بيتخزن ده مش
زبالة، ده مخدرات! هنا كان التحدي قدام الأمن: مين دول؟ والمكان ده فين
بالظبط؟
بعد
فحص تقني للفيديو ، رجال الأمن قدروا يحددوا هوية "المتهمين ". "مسجلين
خطر" من منطقة الوراق. استخدموا مهنة "العامل الغلبان" كستارة عشان يخزنوا
ويبيعوا مخدر "البودر" في نص الشارع، وهما فاكرين إن مفيش حد هيفتش واحد
بيلم زبالة وأنقاض.
المداهمة والاعتراف..
في
كمين في الوراق، وقع المتهمين ومعاهم "الكنز المسموم". وقدام الأدلة
والفيديو اللي مبيكدبش، مقدروش ينطقوا واعترفوا بكل حاجة.. حفروا المخبأ
إزاي وبيروجوا لبضاعتهم إزاي. والنيابة أمرت بحبسهم وإحالتهم للمحاكمة،
عشان تنتهي أسطورة "دولاب الكوبري" ورا القضبان