بقلم الاعلاميه دكتوره غاده قنديل
لم يعد وجود المتسولين في شوارع الإسكندرية مجرد منظر مؤذٍ للعين أو استخدام خاطئ للطريق العام… المسألة اتطورت وبقت خطر مباشر على أولادنا وأمن المجتمع نفسه.
في مناطق راقية زي لوران وزيزينيا، بقى المشهد يومي: أشخاص قاعدين على الأرصفة قدّام الجوامع وعلى نواصي الشوارع، شكلاً متسولين… لكن الواقع أخطر بكتير.
الكارثة إن بعضهم – مش كلهم – بيستغل وجوده في الشارع كغطاء لبيع مخدرات للشباب، ومراقبة الحركة، وتوزيع السموم بطريقة هادية وذكية. ده غير إن وجودهم المستمر بقى بيعمل رهبة للسيدات والبنات، وبيفتح باب لاستغلال الأطفال اللي معاهم في أعمال غير مشروعة.
الناس لازم تفهم… والمتسول مش دايماً مظلوم
مش كل قاعد على الأرض محتاج… وفيه فئة محترفة، منظمة، بتشتغل بمجموعات، وبتاخد الأرصفة ستار.
الطيبة الزايدة “مش رحمة”… ساعات بتكون غفلة بتضيع بها أسر، وبتدخل شباب في طريق ضلمة.
نداء واضح للسيد محافظ الإسكندرية اللواء احمد خالد المحترم النشيط
نحن نطالب سيادتكم باتخاذ إجراءات صارمة وفورية في مناطق لوران وزيزينيا وكل المناطق الراقية والعامة، وأن يتم: وحدائق الشلالات بالليل
تسيير عربات خاصة لجمع المتسولين فوراً من الشوارع
مش حملات موسمية… حملات يومية ثابتة.
تفتيش دقيق لكل شخص يتم ضبطه
لأن بعضهم بيخفي مخدرات أو أدوات مخالفة للقانون.
إحالة من يثبت تورطه للنيابة فوراً
الشفقة هنا خطر… والرحمة الحقيقية هي حماية أولادنا.
متابعة خاصة أمام الجوامع والمقاهي والمدارس
لأنها بقت بؤر يتحرك فيها تجار السموم تحت ستار التسول.
لا تأخذكم بهم رأفة… لأن الرأفة هنا خيانة لأمانة حماية المجتمع
في وقت البلد بتحارب المخدرات وتحافظ على شبابها، ماينفعش نسيب الشوارع مستباحة.
إسكندرية طول عمرها مدينة راقية… ومش هنسمح إن الأرصفة تتحول لواجهة للتسول الوهمي وتجارة المخدرات الحقيقية.