كتب / ياسر جابر
في ذكري أيام النصر يجب أن نتذكر جميعا ان خط بارليف مش هو الساتر الترابي اللي الجيش فتح فيه ثغرات بخراطيم المياه. وان خط بارليف عبارة عن سلسلة تحصينات وخطوط دفاعية معقدة بعمق ١٢ كيلو متر من قناة السويس علشان تمنع جيشنا من الدخول لعمق سيناء لو قدر يعبر القناة .....التحصينات دي مكونة من عشرات المواقع الحصينة المقاومة للانفجارات...وفيه منها طوابق تحت الارض ومربوطة بأنفاق ومزودة برشاشات ثقيلة ومدافع ووسائل اتصال ومحاطة باسلاك شائكة وحقول ألغام وخنادق وحولها مرابض دبابات ومدفعية..الموقع الواحد علي مساحة ٤٠٠٠ متر مربع.
خط بارليف تحته محابس مواسير النابالم اللي لو اتفتحت اثناء عبور قواتنا كانت حتخلي درجة حرارة مياه قناة السويس تغلي علي٧٠٠ درجة مئوية
خط بارليف اتعمل بطول قناة السويس علي مسافة ١٧٠كم .الخط ده كان اقتحامه معجزة وقالوا انه لا يمكن اقتحامه .. مش الساتر الرملي اللي اتفتح فيه ثغرات بخراطيم المياه خالص..
فالساتر الترابي ده أغلبه كان موجود من قبل الاحتلال الاسرائيلي لسيناء في عام 1967
وناتج عن تكريك قناة السويس قبل احتلالها.. واللي عملته إسرائيل هو زيادة ارتفاعه لغاية ٢٢متر بدرجة ميل ٤٥ درجة علشان محدش يقدر يتسلقه.
اللي يقول ان خط بارليف هو الساتر الترابي وانه اتفتح بخراطيم المياه ده تقليل من حجم الإنجاز في العبور العظيم. خط بارليف أكبر بكثير وبسبب قوة تحصيناته اعتبر أقوى خط دفاعي في العالم وقتها.. علشان كده كان اقتحامه يعتبر انجاز ضخم وإرادة مصرية قوية