الأشيه معدن
................
الحِكايه والرواية
البَختِ مايل معايا؟
والمَعاش ياخويا بَح ؟
ولاعادشِ جنيه معايا
اجيب لِعيالي دَح ؟
وِالعِيال مِشْ هامِمهُم
آه يا ناري منهم
نُسخه واحده لُ مهُم
طَالعه وَاكله
نازله دَحْ
قُلت اعَدّي
عَ الفَرارجي
أجيب لي كيلو
جناح وِديل
لقيتوا كاعي
عَ الميزان
ودموعُه نازله سيل
سألتُه مالَك
ياعَمِ مَالِك
قال لي بَبكي
عَ الزمالِك
واديني رافع
ألفِ شكويٰ
كُل فِرَق
الدوري تِمّه
مصطادانا غسيل وِمَكويٰ
بعدين لقيتُه
بِشويش ندهلي
(وِصَنِّ ) حَبّه
وِعاب في أهلي
قَاللّي مَنتوا
خَتّوا خمسه
وِاوعيٰ اشوفَك
عَندي تاني
وَلاّٰ أسمع نُص همسه ؟
قُلت سيبك
ياعم فِكّك
لاتقولّي أهلي
لاتقول زمالِك
داحنا يوم
مَعرِفنا ابوهُم
وِاحنا حالنا
ياسطه حالِك
مَمْعَكْشِ صَاغ
أجيب بُه فول ؟
أنا بطني نونو
معدشِ صابر
طَب هات لي
هَبشه مِ الرِجول
أوحتّي حِتّه
مِ الحَوافِر ؟
ياما نفسي
في جوز رجول
الجوع ده يابني
أصلُه كافِر
فَتّشتِ جيبي
مَلقِتشِ فكّه
قُلت أدوّر
في الجاكِتّه
فِضِلت ادعبَس
لِلصُبحِ فيها
نَتّفتٌ ابوها
حِتّه حِتّه
وامّا عقلي
شَتِّ مِنّي
زِهِقتِ مِنَّهُ
ومن لَكاعتُه
ومن جُنوني مِ اللي حاصِل
بنطلوني الصوف قلعتُه
ولاعادشِ فاضِل
ياعَمِ فاضِل
في بيتنا كُرسي
إلاّٰ بيعتُه ؟
ياولِيّه شوفي
مِين بِيخَبّط
ياحَجِ حَاضِر
رُدِّ بالَك ....!!!
ياداهيه دُقّي
لَيكون حَدُقّه
جَي يشكي
الواد حَمُقّه
أصلِ دِيكِ
اليوم بَعَتُّه
جابلي كيلو
فِشّه مِنُّه
وياريتني ياختي
مَاكُتِ خَتُّه
ولاكُتِّ حَتّي
سِمِعتِ عَنُّه
أجيب مِنين
دِلوقتي حَقُّه
يارب عَجِّل
في كَسرِ حُقُّه
قبل مَسْمَع
كلمه مِنُّه
..........
دَخلت انام
مَجَاني نوم
هَم مِتلتِل
والغم كوم
إلاّ جايّه السِت مِراتي
معاها جِبنه وفول حِراتي
وعيش مِرحرح وفول بِتوم
قعدنا نَاكُل واللُقمه سُكّر
ولاحَد فينا كان بيفَكّر ؟
أنا أظلُط وِهِيّا تُظلُط
أنا أظلُط وِهِيّا تُظلُط
كَبَس علينا النوم فَ نِمنا
وامّا قُمنا لاقينا روحنا
من شَبِعنا جالنا سِمنه
والخير مِرطرط
والفِلوس كِتير
ناكُل ماناكُل
ونِلبس حرير
لامَرّه جوعنا
ولايوم اشتكينا
ومن فرحنا
ناقص نطير
عايشين في نعمه
والأشيه معدن
واللّي مِش شايفها
أكيد ضرير !!!
.............
ابراهيم دياب