بقلم : محمد حسني محمود
في حياتنا، كل واحد فينا بيجري ورا حاجة نفسه يتقنها. بس الحقيقة إن مفيش حاجة بتيجي من أول مرة. التكرار هو المفتاح الحقيقي الطريق الصحيح كل سنه في المفتاح بتجعل منك رحلة للسنه الثانية والثلاثه لفتح باب النجاح . زي انت ما كنت طفل كنت بيتعلم تمشي: بتقع ألف مرة، بس في الآخر بتقف وتتوازن. نفس الفكرة مع أي مهارة.
التكرار مش معناه ملل، بالعكس ده معناه إنك بتبني حاجة جوة عقلك وجسمك واحدة واحدة. كل مرة بتحاول، بتضيف طوبة في جدار المهارة. وبعد شوية، اللي كان صعب وبياخد وقت، هيبقى تلقائي وسهل كإنك بتشرب كباية شاي.
ولما توصل للمرحلة دي، بتحس بحاجة مهمة جدًا: الثقة. الثقة مش مجرد كلام بتقوله لنفسك، دي إحساس حقيقي إنك قادر، لإنك جربت ووقعت وقمت وأتقنت.
الثقة الحقيقية مش اللي بتيجي من كلام الناس أو من أوهام. الثقة الحقيقية بتتولد من تعبك وممارستك. كل لاعب كرة، كل موسيقي، كل حد ناجح في مجاله مر بنفس السكة: تكرار كتير، مهارة اتبنت، ثقة اتولدت.
النهارده لو عندك حلم أو مهارة عايز تتعلمها، ابدأ بخطوة صغيرة. حاول، وغلط، وكرر. افتكر إن التكرار مش بيستهلكك، ده بيبنيك. ومع كل محاولة، هتلاقي نفسك أقوى، وأكتر ثقة.