أنا عارف
إن العُمر اتسرق
واللي باقي مِنُّه
حَبِّة ورق !!!
وعرَق ..
وغرق ..
بَقيت الملم ...
في طرف العبايه
اللي فاضل
من كل الحِكايه
من بواقي الجسم
اللي باش
واللي لسه جُرحُه
مَنتهاش
واللي نفس الوجع
بيزورُه كل يوم
يِنهش في عضمه
عضمه عضمه
زي عَض البوم
يِجرح مِنين مايجرح
يِدبح مِنين مايدبح
مَحدّش بيقول كفايه
الحِكايه ...
لا الليل بيداوي ؟
ولا النهار بيطبطب عليك
ديب في كل حتّه مستنيك
واقف ...
مِستَنّي طلوع الروح
وجروح بتنزف مَرار
ونار بتكوي
ودموع بِتشُق خَدَّك نُصّين
وعينين مِ العَما
ضي السما مَهيش شايفاه
وآه
لما تشكي
ولاحدّش يسمعك ؟
والآهه طالعه مِنّك
طارحه ٣٠٠ آه
كل آهه
تِدبح جَمَل
تِصعب عليك دَمعِتَك
ومن لوعِتَك
تِبات الليل غرقان
في دموعَك
ومن جوعَك
رابط علي بطنك
تَل اجبال
ماهو الحظ لومال
مين يعدِلُه
غير الإله ؟
وآه ...
لو نبضِ قلبك ذاد
كُل الدَوا مايداويك
كِترِت بلاويك
ومَنتاش لاقي
غير القبرِ يِأويك ؟
أُصرُخ ...
وِاملا الكون زِعِيق
قول ان انت مظلوم
قول ان انت برئ
خَلّيك جرئ ...
متخلّيش الخوف يِحدِفَك
بَرَّه الطريق ؟
متخلّيش الضلمه تِغزِلَّك
مِ الخَضّه خوف ؟
وان كان علي الشوف
بُكره الشَمسِ تِطلع من جَديد
وتنَوّر قلوب الخلق
من تاني
كُل الأماني مُمكِنَه
ومين مِنِّنا ؟
مَسلِمشِ يوم مِ الألسِنَه ؟
ومِين مننا ؟
ماداقشِ يوم
طَعمِ العزاب ؟
وِبعدَهالِك
يادُنيا كُلِّك عزاب
في عزاب ؟
ويفيد بأيه العِتاب ؟
والبُكا ....
أنا جِسمي داب
كِفايه بقيٰ ؟
حَبلِ المشنقه
عَلَّم علي رِقَبتي
كام مَرّه دوستي علي توبي
وكام نوبه رغمِ شيبتي
فِيّا عِبتي ؟
وانا من طِيبتي بَسامِح
مَكَفّكِيشِ ضَهري اللي اتحنيٰ
مكفكيش العَنَا والعَمىٰ ؟
مشوفتيشِ ملامح وِشّي ؟
ولسّاكي بِتعاندي وِتغِشّي ؟
علي العموم
أنا ...
مِش جَي اعاتبِك
ولاقصدي اشتكيلِك
كُل الحكايه
إنّي عاشق نيلِك
ورغم الوجع
برضو ....
جَي اغنّيلِك
جي اغنيلك
.........
ابراهيم دياب