الغلباوى قط. وفأر
غلباوى لخبطتلى كياني
بيخبى ليه طقم سناني
دوخنى جرى حواليه
فى الاخر بيقولى خلاص
قال.. أنا شايله من خوفى عليه
أنا خائف أنك تنساة
ومعايه ياجدو هتلاقه
قلت.. قلتله يلا مش عايز اشوفك
قال. . معقوله ياجدو تطردني
طب مين هيقولى تعالى فى حضني
قلت.. راح اسامحك بس هتوعدني
قال. . ياجدو انت مدلعنى
علشان سنانك هتبعني
قلت.. معقوله أنا أقدر أبيعك
بس انت دائما تعاندني
بتخبى حاجتي وتتعبني
قال.. يا جدو من غيرك يلاعبني
قاعد تقرأ لوحدك وسايبني
أنا سايب بابا وماما علشانك
زعلان منى عشان طقم سنانك
وامال لو تعرف فين عكازك
قلت .. هو انت مخبى عكازي
وأقوم انا ا دورعلى العكاز
الاقيه بيضحك ومسخسخ
ياابني قلى فين العكاز
قال .. مش هقولك خليك متغاظ
جدو تقدر تضربني
قلت.. طبعا حتما واكيد لازم اضربك
طب يلا اضربنى ومش هجري
طيب اهو على راسك...
قال.. يضحك الضرب وجعنى بعكازك
قلت. واتارى عكازى فى ايدى
قال.. يضحك ويقول. ياجدو..
انا طفل وانت مصدقني
لو حتى عايز تدبحنى
ادبحنى بس تسامحني
قلت.. صدقت جدو زعلان
مش ممكن انا منك ازعل
بس عقابك عندى مفيش
قال. . مفيش ايه ياجدو.
قلت.. مفيش النهاردة حكايه.
قال.. انا خفت تقول مفيش مصروف
انما حكايه راح اسمع تيته
تحكيلي حدوته بسيطه
وبكرة انا وانت في ميعادنا
ونقول لحبايبنا نتقابل بكرة مع
الغلباوى
. محمد محمود عبد الدايم