أنا عارِف...
إن النهايه قَرّبِت!!!
وان اللي باقي من عُمري
مش قَدِّ اللي فات
والحاجات الحلوه
وابتديت احِس
بِحَبِّة حاجات
زي ميكون حاجه
بِتشِدّني شَدْ
بحر غويط ومُحيط
وجَزر ومَدْ
صوت مآذِن وآدان
نعوش وجُثث وأكفان
ومطر وخطَر وجروح
وناس ماتِت
وناس عايشه
بس الروح مِش معاها
وغيامه صفره
بِتِشتي دموع
وبتِرمي عَ الخلقِ بَلاها
ونهار طالع حزين موجوع
وليل مِستنّي القمر
علي شط النيل
وجنازه علي فلوكه
من كُترِ الهَم بِتميل
علي شط النهر
ودنيا مالها أمان
خاينه زي الظَهَرْ
مَرّه تِدّي أمان
ؤالفِ ذُل وقَهرْ
وموت بيسرق
جيل ورا جيل
بُكا ودموع وخشوع وخنوع وعويل...
وليل طويل
وأوّل طلوع الشمس
أسمع منادي الموت
من تاني بينادي
فاستخبّيٰ في كوم القش
فايلمَحني اليمام في العِش
أعمل درويش وعبيط
واغنّي بِصوت وطاويط
يِندَه عَلَيّا الموت
أستخبّيٰ في حِجري
فايجري ويقفشني
واموت....
ابراهيم دياب