ما تزعليش
***********
ما تزعليش
لو قلت لك نفضل صحاب
أو حتى أخ بيشتهى
تاخد جواب
من واد مسبسب قُصته
وف قلبه صوت نبض الشباب
ما تزعليش
لو قلت لك نفضل صحاب
وبلاش نفكر
نشترى لروحنا العذاب
مالها الصحاب
ف الصُبح أقابل حضرتك
وارمى السلام
واسمع بودنى ضحكتك
بعد العشا
عِشق وغرام
وتشوف عيونى فرحتك
ع الدردشه
وادخل انام
من غير ما افكر ارسمك
غُصن السلام
من غير ما افكر اكتبك
كل الكلام
ولا حتى أحضن فرشتك
واقول تمام
ولا أقول لروحى المغرمه
تعشق نجوم زاينه السما
طُلت السحاب
مالها الصحاب
لو يوم نخاصم بعضنا
ما يهمنا
وف قاعدة واحدة ع الكافيه
مع اسمه ايه
والنسكافيه
بتلمنا .. كلمة عتاب
والضحكه ترجع تترسم
فوق الخدود
من غير قيود
واكتب على الفَرًح الكتاب
مالها الصحاب
افضل كتير م الحُب
لو هيوصلك للإكتئاب
وعذاب بتقتل قسوته
قلب الحمام
أفضل كتير
من ورده ناديه بتترمى
وسط التراب
من حلم لو يوم يتوصف
يبقى السراب
وعيون بتشكى من السهر
ودموع بتنزف م الوجع
مكسوفه من عين الأنام
والإغتراب
مالها الصحاب
لفيوم بتسهر تشتكى
عِند القمر
لحظة خسوف
ولا يوم بينزل دمعها زى المطر
وتقول كسوف
ولا حتى بيدوق حلقها
مُر العذاب
مالها الصحاب
فرح وهَنا
لعب وغنا
ألوان بترسم بالمَنى
روح الشباب
لفيوم بيجرح خدها
سيف الدموع
ولا يوم بيكتب ذُلها
حبر الخضوع
ولا حتى من كاس مُرها
الشِعر جوه قلبها
عجز وشاب
ما تزعليش
لو قلت لك نفضل صحاب
ما هو ع الأقل هتعرفى
ان المتيم بالوجع
قلبه اللى حبك وانكوى
لساه فاتح لك للهوى
كام ألف باب
فما تزعليش
لو قلت لك نفضل صحاب
*****************
رضا أبو الغيط