((( إحنا فى الأرض بشر )))
مش ضروري تكون ملاك
إحنا في أرض البشر
أو شيطان غايته الهلاك
عيش حياتك حبه حبه
وإروى روحك بالمحبه
دى الحياه نقطة بدايه
وكل شىء فيها القدر
إحنا ياابنى مش ملايكه
إحنا ع الأرض بشر
كل واحد له نصيب
طول م ناس ف الدنيا عايشه
طلقه صايبه وطلقه طايشه
ليه بنكره رغم إن
الحب فينا هينتصر
حتى لو مات جوه منا
أو إنكسر
ليه بنخلق همنا
ليه نوايا الشر
دايما تنتشر
جوه منا قلوب تحس
ليه نخليها حجر
طهرنا أصبح نجس
كل يوم بنلاقى بلوه
أخ بيقطع أخوه
إبن وبيقتل أبوه
حتى قلب الأم مات
والضمير أصبح سكات
وهى دى حكاية البشر
الأديب الشاعر / أشرف فؤاد السمادونى