يَا رَبّ جَايْلَك
ــــــــــــــــــــــــــــــــــــــــــــــ
يَا رَبّ جَايْلَك عَ القَدَم
تِحْكِي الدُّمُوع حَالِي
شَايِل جِبَال مِ النَّدَم
تَايِه بَقَاسِي الأَلَم
وِبَالِي مُش خَالِي
يَا اللي بِإِيدَك القَلَم
إِصْلِحْ لَي انَا بَالِي
وِاغْفِر لِجَاهِل ظَلَم
نَفْسُه بَقَى الْجَانِي
نِسِي النَّعِيم وِالنِّعَم
نَسَّانِي شَيْطَانِي
أَنَا اللي بِيك مُعْتَصِم
وَانَا الضَّعِيف فَانِي
لَو كُنْت عَنْدَك شَقِي
وِانْتَ العَلِيم شَانِي
أُوهِبْنِي نُور التُّقَى
زَوِّدْلِي إِيْمَانِي
أُوْعِدْنِي دَار النِّعَم
دِي الْجَنَّه وَحْشَانِي
يَا رَبّ جَايْلَك عَ القَدَم
تِحْكِي الدُّمُوع حَالِي
شَايِل جِبَال مِ النَّدَم
وِالْحُزْن مَوَّالِي
ــــــــــــــــــــــــــــــــــــــــــــــ
كلمات الشاعر أحمد شاهين
----- مصر -- أسيوط -----
