ست الستات
يا بنت الريف يا مصريه والشهامه ف طبعها .
ياللى الجمال باين فى صورة والحلاوة كلها .
والسعاده والفرح واضح وزاين وشها .
وريحة الخير على الإيدين الحلوة طالع منها .
والضحكه صافيه ع الخدود الورد مين قدها .
والحشمه زينه والأصاله لو تشوفها فى لبسها .
مين ده اللى يلمح شعره باينه والاَّ طرف ف شعرها .
والجلابيه ماشيه تكنس فى الشوارع خلفها .
لو تجوع تاكل صوانى الخير من إيديها وطبخها .
وفطيره سخنه بسمنه بلدى تنسى بيها هموم الدنيا كلها .
إن جالها ضيف من غير وصيه تشرف بلاد بزيها .
وعليها مسكة عود الحديد ولا أجدع فرَّان فى العالم زيها .
كل الثقه والقعده أُدام طبليتها وفرنها .
لا يوم كلٌّت ولا ملَّت وهى بتعمل بالسعاده شغلها .
بنت الرجال وزوجة الرجال حد يقوللى مين قدها .
اللى كل الدنيا تضحك لما يضحك سِنها .
هى الوتد هى اللى تجمع عيله وشملها .
كل اللى عايز بيمد إيده ويطلب منها .
لو فى بيتها أو فى غيطها هى السند والضهر والرجوله ف طبعها .
وأما تتزين وتتجمل بالحلال تشوف أنوثه تحبها .
وأما تخجل مات الحياء كل الحياء من بعدها .
تحفظ حقوق الغير ما تمد إيد غير من نصيبها وحقها .
تعرف أصول الواجب ولا حد سابق قبلها .
ست الحبايب والأخت والزوجه عند الله يابختها .
ياللى جمال الروح والكرم مات من بعدها .
خيرى ناصف khayry nassef