الشاعر_حسين_الديب
خد نفسك من نفسك و إجري
و ما تستناش منك صدقة ،،
ماتقولش العمر دا فيه بدري
و القصة معاك لساها بادئة ،،
فجأة هـ تتفاجئ بنهاية
و تلاقي مافيش أيام جاية ،،
و تنتهي وياك كل حكاية
الكدب مع القصة الصادقة ،،
..........
خد نفسك من نفسك و إجري
قوم خد وياك كل الماضي ،،
ماتقولش العمر دا فيه بدري
و تعشم نفسك ع الفاضي ،،
فجأة هـ تتفاجئ يوم إنك
الدنيا بـ تخَيب ظنك ،،
و مافيش في الكون هـ يشيل عنك
حتى إللي عليك كان بينادي ،،
..........
خد نفسك من نفسك و إهرب
و ما تستناش منك حاجة ،،
و تسيبها إذا جت تِعمر تخرب
عيشها و كإن إنت خواجة ،،
قوم و إنسى الناس إللي إديتهم
أو عايش بتعمر بيتهم ،،
قوم كفن و إدفن ميتهم
و إنسى إن الناس ليك محتاجة ،،
..........
قوم لملم نفسك ع الماشي
حافظ ع الوقت إللي باقيلك ،،
و إستنى الموت إللي ماجاشي
دا الموت هـ يلف و هـ يجيلك ،،
و إذا كان الموت لف و سابك
بكرة هـ تفارق أحبابك ،،
راح ترحل و تسيب أنسابك
و المخلص بس هـ يدعيلك ،،
خد نفسك من نفسك و إرحل
قبل ما يتقاسمو فـ هلاهيلك ،،
،، شكراً ،،