حوار بين زينب وزوجها عبده بمناسبة دخول ابنهما عاطف الحضانة
كتب احمد الغمري
نادي عبده علي زوجته فقال لها ايه ده يا زينب
ردت زينب ده السابلايز بتاع الواد عاطف يا عبده
سابلايز ايه ده رايح الحضانة
اسمها كي جي ياخويا ولازم نجيبها
ليه لازم هي طلبات الاسياد
ما خلاص بقي ياخويا مش عاوزين الواد يتعقد ولا الميس تستقصده
امري لله هاتي ياستي عايزة ايه
علبة الوان 36 لون فبريكاسل
ليه يا زينب هو داخل فنون جميلة ده كبيره قلمين علي وشه وايه ده كمان ورق رسم هندسي
زينب انتي مقدمة للولد في الهندسة
يووه بقي انت كده
زينب دول طالبين من الواد ديتول ومعقم ايدين
عبده يرد عليها هما هيعملوا عمليات للعيال في كي جي يا زينب
يا عبده بقي ما كل العيال هتجيب هو يعني ابننا عجبة
حاضر حاضر هقوم اجيب
فوم ياعبده جيب جليتر وفبريكاسل واقلام باركر واقلام ماركر وكراسات وورق A4 لازم A4 عشان محدش يقول حاجة ياعبده
عايزة ايه تاني من الزفت عبده
متنساش اللانش بوكس والفلاسك
كلميني عربي الله يسترك انا روحي في مناخيري
يعني علبة الاكل والفلاسك يعني الزمزمية
رد عبده وقال لها الله يرحم ابوكي يازينب كان بيشرب من الزير .