(( صوت العرب ))
من غير كسوف
كل الظروف سكا
وصفوف بتتشكا
والسكة زعر وخوف
يا فرحة الفكة
في التوهة والعكة
فاضل يادوب تكة
وتصادر المصروف
دقة كفوف الجلد
ع اللى اتولد مكشوف
ملهوف ياقلب الأمل
صاب الملل دقك
والحيرة بتزقك
والغلب شقك شق
وسمعت دق الزار
وسبحت في الاعزار
ولمحت وسط النار
قلب الخضار محروق
سوق المرار منصوب
داخل مدار روحنا
طال الحصار واحنا
فوق الخراب قاعدين
نوح غراب البين
والتل بقى تلين
الشمتانين منا
والمشبوهين منا
والمسؤلين عنا
غرزوا الوطن في الطين
سلاطين وحالهم شوم
وملوك عشاهم نوم
ورئيس مالوهش لزوم
معزوم على الريحة
ياعم تلقيحة
نفسى في مرة تزوم
طول م النفس مكتوم
كوم الهموم هيزيد
يا أمة التوحيد
كيد العدا طالك
من كتر اعطالك
حالك سداح في مداح
واتسيطو الاشباح
والخيبة راكباكى
ضى النهار باكى
والليل عليل بيئن
وسوادة ملاكى
العجز سواكى
ورماكى في الاهوال
مابين جبال الصمت
والشجب والتنديد
بخ الحديد سمه
وصدورنا بتلمة
جملة وقطاعى
شوبش ياراعى القصر
سممت دم العصر
والحصر ليك وعليك
شرفتنا معاليك
وكشفتنا للموت
صوت العرب غلق
والحلم متعلق
بين السما والارض
عرض الوطن مدبوح
والطول ذليل بينوح
وياروح ما بعدك روح
هبى يا حرية
داوى الجروح فيا
وادى القضية مصل
يروى الاساس والاصل
ويكون ختام الفصل
انا نعود ثوار
أحرار وفدائية
ونكمل المشوار
وكفاية عبودية
