مالنا مِلنا ؟ إيه جرالنا؟
مصر دى مش أُمّنا؟!
أمنها مِن أمنِنا ؟!
ليه نجور على بعض ليه؟ ليه نخوّن بعض ليه؟
والكُره يبقى ف دمّنا
مصر دى مش أمّنا ؟!
أمنها مِن أمننا؟
مصر نيلنا مصر خيرنا
ليه بنخرِب ليه عمارها؟ ليه نضلّم ليه نهارها؟
مصر دى مش أمّنا؟!
أمنها من أمنِنا؟!
مصرى يقتل مصرى زيُّه أو يعادى الاخ خيُّه
أىّ شي مهما اختلفنا العقل يُحكُم فى اختلافنا
الحلّ مش فوضى وسلاح
ولابالجراح هتطيب جراح
مصر دى مش أمّنا؟!
أمنها من أمنِنا ؟!
مش مصرى مِن هدِّلها طوبة
ولا هتقبل منُّه توبة
إن فِضِل يحرق نخيلها إن ماصان معروف لنيلها
ولايستحق يعيش عليها ولا تمِدّلُه يوم إيديها
مصر دى مش أمّنا ؟!
أمنها من أمنِنا ؟!
مش مصرى مِن شوّه جمالها
مش مصرى مِن خيَّب آمالها
مش مصرى مِن أنكر جميلها
ليه تكون عايش فى خيرها
تخون وتخدم حدّ غيرها
مصر دى مش أمّنا ؟!
أمنها من أمِننا ؟!
المصرى إنسان أصلُه طيّب
مِن جارُه ، مِن أهلُه قُرَيّب
إرهابى مش مصرى أكيد دايبقى جايلِنا من بعيد
عمرنا كده شعب واحد مفيش مابينّا حدّ جاحِد
إيه جرالنا؟ مالنا مِلنا؟
مصر دى مش أمّنا؟!
أمنها من أمنِنا ؟!
______________
حامد حبيب
