قدم لنا هذه الموهبة الأديب والشاعر الكبير أشرف أبو جليل ونقلتها عنه إليكم دعما لشاعر شاب يؤكد أن مصر ولادة
وقال ؛_
كالعادة اقدم لكم يا محبي الشعر موهبة جديدة ، طالبا في الثانوية العامة ، قرا فؤاد حداد والابنودي وحجاب ونجم وغيرهم واحتضنه نادي الادب بالفيوم هو الشاعر الموهوب حقا : أحمد الفيصل
(ادعموه بالرأي)
---------‐
بياع الورد الشاطر
شعر : أحمد الفيصل
الفيوم - طالب ثانوي
---------
غمي عنيك عن كل العالم
وامسكلك ورده
امسكلك زكري تخليك تبكي؛
اول ما حبيبك يغدر بيك
امسكلك ورده؛ يمكن تنعيك
هنعيد تاني!
لازم كورنيش النيل يسمع
وضروري ابيع
الورد الاحمر بينادي.. والوضع وضيع
بياع مستقبل؛ لو تاه يضيع'
بياع شاطر، بياع دوله
بياع بالحب وعمري ما شوفت الورد مقاوَلة
بياع وبيكسب كل الدنيا
ولكنه بيخسر اخر جوله
بياع الورد في زمن الغدر
بيساوي نياتي بيعزف عود
ويساوي الناي في أدين عواد
بياع والورد عليه اقساط
والورد في صوتي كمان بينادي
ويدَادِي زبونه حبيبها كاسِرها
بيدَادِي زبون الفقر بيسرق مِنُّه حبيبته
وكمان بِيدَادِي الشاب الهربان مِن خيبته
بسرح ببكيه الورد
وبشوف علي راس البنت حجاب
بعرف إن الإسلام دينها
بحود بالورد قصاد عينها
الوحده ب٥ جنيه
ي جميله ياحلوه ياست الكل
ي أميرة الناس
ي عنيكي بتشبه للورده
ي ملامحك ونجومها البارده
كان يوم في روايه وشوفتك وارده
حسيت صورتك ..حسيت قلبك
هو انتي السارده؟
الورد ده للحبيبه ي هانم
ممكن تاخدي
لا مش هاخد....
ممكن بس تشمي ريحتها
لا مش هاخد....
طب ممكن تاخدي عشان جيبي الولهان يرضىٰ
طب اقولك حاجه
انا عارف اسم السارق قلبك
والله أنا عارفه !
عارف مين يابو ورد مزوق زي كلام....
عارف اسمه!
اسم ده ايه ياعبيط ياهبل...
انا عمري في يوم ما عرفت الحب...
ولا حد بيسرق عيني اساسا...
لأ بتحبي!، "سيدنا محمد"، صلي عليه
قولي ياهانم، .. مش بتحبيه؟
ممكن تاخدي وتديني الخمسه جنيه
فبتاخد مني، بعد الخطه السحريه ما تنجح
شاهد عالمنظر نور الشمس/ وعفار/ وغبار/
وجيوب مستنيه جنيه/ ومرار طافح/
واقف علي جنب الشاب الجينتل
شايف كل المشهد بعيونه
معجب بيا عشان بعرف ابيع
وكمان كان واقف مستنيني
ممكن تاخد ورده ياشاطر
ممكن تاخد ورده يابيه
يامعلم للناس احساس
انا مش مسلم...
وانا مسألتش
وانا بياع شاطر جدا
وانا بياع وزماني بيلطش
كرباج الدنيا بيعرف يبطش
والورد بيدبل مني بسرعه
والريحه بتطفش
الورد لكل الناس يابرنس
ي امير للجان
وكمان سلطان للناس والانس
انا عارف اسم المحبوبه بتاعتك
دي كمان بتحبك وتبوسك بعد ما بتضمك
ودي تطلع مين وانا قلبي اساسا مش بيحب...
فبقوله ياراجل! .. هو انت مبتحبش امك!؟
فبيضحك بسزاجه، وبياخد ورده
بياع شاطر
راسم اي سيناريو وببيعلك بالعافيه
بياع بالنيه الصافيه
بياع بجيوبي الحافيه
وكلامي بيعرف يسرق ودنك
حركات جسمي، تصعب علي عينك
ولساني مزوق
قادر ارسم لزبوني العظمه وقادر اشتم في الدنيا
اه يا دنيا ياكلبه ياقالبه سواد علي كل الناس
ومرمطه في ملامح عيل غلبان متداس
انا بكره هكون شاهد انك
العافيه وجايبلنا الكافيه
من كعب الرجل لحد الراس
