مانيش مضطر أعيش مغلوب
واشرب من محيط الصمت أبات غيري
واسلم للغروب ذاتي وأنكرني
واشيل الكون على ضهري
مانيش أيوب وفارش بالرضا زمني
ولا اكون نوح وصابر ع السخريه م الناس
ولا موسى أواجه كل يوم فرعون
ولا كنت يوم لقمان
أنا إنسان
على فيض الكريم عايش
وراضي بحكمته فيا
تاخدني الدمعه اعيش الحزن
واعيش الفرحه لو دقت في يوم بابي
ولكن باعتبر نفسي نبي بلا وحي
وشايل جوه قلبي رسول
واحب الكون يكون فاتح ايديه للناس
لا حد يحد خطوة حد
ويقتل رغبة الرحال
وعارف إن ده م الصعب
وحته من خيال ومحال
وان النفس مش واحده
ساعات تبقى ملاك طيب
ساعات تبقى شيطان مارد
أنا عايش هابيل شارد
ومالك بس حرف القول
وفارش كلمتي للناس
بساط أخضر
وقايد صبح أفكاري كتاب مفتوح
وروحي عايشه طوافه في ملك الله
باحب الله
واحب اللي يحب الله
في أي زمان
واي مكان
أنا إنسان
.نبيل مصيلحي
